सुनिल शर्माको राहतको निहुँमा कानेपोखरीमा दलीय मनमुटाव, छुट्टै राहत बाँड्दै कांग्रेस 

नोबेल अस्पतालका संचालक डा. सुनिल शर्माले गत बिहिबार मोरङको क्षेत्र नं.३ का कोरोना प्रभावितका लागि तीन नगरपालिकालाई ३० लाख ३६ हजार राहत रकम प्रदान गरे । बेलबारीमा भेला भएर सुन्दरहरैंचा, पथरीशनिश्चरे र बेलबारीका नगर प्रमुखले डा.शर्माबाट राहतको चेक बुझे र गरिब, बिपन्न तथा कोरोना प्रभावित जनतासमक्ष राहत पुर्याउने प्रतिवद्धता पनि जनाए ।

गत प्रतिनिधिसभा निर्वाचनमा कांग्रेसबाट उम्मेद्वारसमेत बनेका शर्मा तीन नगरपालिकालाई मात्र राहत दिन बेलवारी पुगेका थिएनन् । उनी क्षेत्र नं.३ का कानेपोखरी गाउँपालिका सहित चार वटै पालिकालाई राहतको लागि सहयोग हस्तान्तरण गर्ने घोषणा गरेर बेलबारी गएका थिए । डा. शर्माले चार वटै पालिकालाई राहत प्रदान गर्न लागेको खबरले सामाजिक सञ्जालका भित्ता बिहानैदेखि रंगिएका थिए । तर अन्ततः कानेपोखरी बाहेकका नगरले मात्र राहतको चेक बुझे ।

कानेपोखरी गाउँपालिका अध्यक्ष ताराबहादुर काफ्ले पूर्व निर्धारित कार्यक्रममा राहतको चेक बुझ्न गएनन् र दाता डा.शर्माले कानेपोखरीबासीलाई दिन ठिक्क पारेको ५ लाख रकम उम्कियो । अध्यक्ष काफ्ले राहत बुझ्न नगएपछि कोनेपोखरीको भागमा परेको रकम डा.शर्माले फिर्ता नलग्ने भन्दै तीन नगरपालिकालाई नै थपिदिए ।

यता, कानेपोखरी अध्यक्ष काफ्लेले आफुलाई आधिकारीक जानकारी नआएकाले राहत बुझ्न नगएको बताएका छन् । तर, आधिकारीक जानकारीको कुरा गरेर राहत लिन नआउँनुमा कुनै तुक नरहेको बेलबारी नगरपालिकाका प्रमुख ज्ञानेन्द्र सुवेदी बताउँछन् ।

राहत लिनका लागि चारवटै पालिकाका प्रमुखहरु बेलबारीमा भेला हुने सहमति भएको भएपनि कानेपोखरी अध्यक्ष काफ्ले नआएको नगर प्रमुख सुवेदीले बताए । ‘सबैको सेन्टर पर्ने भएकाले बेलबारीमा राहत ग्रहण गर्ने कार्यक्रम तय गर्यौ । कानेपोखरी अध्यक्ष काफ्लेसँग पनि अघिल्लो दिनदेखि ५ पटक फोन सम्पर्क भएको थियो । उहाँ आउन तयार हुनुहुन्थ्यो । तर, पूर्व निर्धारित कार्यक्रमको समय भईसकेपछि अन्तिममा फोन सम्पर्क हुँदा उहाँले म नआउँने भए भन्नुभयो र आउँनुभएन ।’ सुबेदीले भने ‘उहाँले आधिकारीक व्यक्तिले खबर गर्नुपर्यो भन्नुभएको भए म वीचमा पर्नुपर्ने कामै थिएन । सुनिल जीलाई आफै सम्पर्क गर्नु भन्दिने थिए ।’

बेलबारी नगरप्रमुख सुवेदी र कानेपोखरी गाउँपालिका प्रमुख काफ्ले दुवै नेकपा निकट हुन् । बेलबारी नगर प्रमुख सुवेदीसँग राहतको बिषयमा फोनमा कुरा भएको कानेपोखरी अध्यक्ष काफ्ले पनि स्वीकार गर्छन् ।

राहत स्वीकार नगर्नुमा आधिकारीक जानकारीको कुरा बहाना मात्र भएको दाता डा.शर्माको बुझाई छ । डा. शर्माले अहिलेको अवस्थामा जनता नै सर्वपरी भएकाले गाउँपालिका अध्यक्षले राहत स्वीकार नगरेपनि कांग्रेसको तर्फबाट राहत बाँढ्ने बताएका छन् । राहत ग्रहण नगरेको घटनाले अहिले कानेपोखरीमा राजनीतिक असन्तुष्टि चुलिने संकेत पनि देखाएको छ ।

काँग्रेस कानेपोखरीले राहत ग्रहण नगरेको घटनालाई गंभीर त्रुटी र अक्षम्य घटनाको संज्ञा दिएर भत्सना गरेको छ । राहतमा नेकपाको मनोमानी बढेको भन्दै कानेपोखरी कांग्रेसले बिज्ञप्ति जारी गरेर अब राहत वितरणको एकद्वार प्रणाली उल्लंघन गर्ने चेतावनी दिए लगत्तै  कानेपोखरीमा कांग्रेसले राहत संकलनका लागि अभियान पनि थालिसकेको छ ।

गाउँपालिकाले बिज्ञप्ति जारी गरेर खातामा रकम जम्मा गर्न सकिने भएपनि बहनाबाजी गरेको आरोप लगाएको छ ।