जेफालेमा नयाँ बर्षमा पर्यटन मेला, भलिबल प्रतियोगिता तथा साहित्यिक कार्यक्रम हुने

केराबारी, मोरङ / उत्तरी मोरङको केराबारी गाउँपालिका-२,सिंहदेवीमा पर्ने पर्यटकीय स्थान जेफालेको फेदीमा नयाँ वर्ष २०७६ को अवसर पारेर पर्यटन मेला, भलिबल प्रतियोगिता तथा जेफाले साहित्यिक कार्यक्रम हुने भएको छ ।

विगत वर्षहरुमा झैँ यस वर्ष पनि पर्यटन मेला, भलिबल प्रतियोगिताको उद्घाटन पश्चात् बैशाख २ गते जेफाले साहित्यिक रचना वाचन कार्यक्रम गरिने भएको आयोजक कमिटीका अध्यक्ष भीम ठकुरीले बताए।
कार्यक्रममा कविता तर्फ राष्ट्रिय स्तरका कविहरु सुदीप पाख्रीन,कवि राज माङ्लाक, कवि हेमन यात्री र कवि तथा समालोचक मुनाराज शेर्मा आफ्ना कविता मार्फत प्रस्तुत हुनेछन् भने गजल तर्फ जीवी गजल र युवराज ठकुरी “अज्ञानी”र सन्देश तुम्बापोको प्रस्तुति रहने छ।त्यसै गरि अन्य उपस्थित स्रष्टाहरुले पनि जेफालेमा साहित्यिक रचना वाचन गर्ने आयोजक समितिका सदस्य विपन राईले बताए ।
पर्यटन सँग साहित्य जोडेर पर्यटकीय स्थानको विकासमा टेवा पुर्‍याउने अभिप्रायका साथ जेफाले साहित्यिक रचना वाचनको कार्यक्रम आयोजना गरिएको २नं. वडाका वडाध्यक्ष प्रेमबहादुर लिम्बूले बताए।
पर्यटन मेलामा साहित्य वाचन संगै नकाउट भलिबल प्रतियोगिताको पनि आयोजना गरिएको छ।प्रतियोगितामा प्रथम हुनेले रु ५११११/- कप,मेडल र प्रमाणपत्र ,दोस्रो हुनेले रु२५५५५/- कप ,मेडल र प्रमाणपत्र पुरस्कार प्राप्त गर्ने खेलकुद समितिका अध्यक्ष देवी लिम्बूले बताए । उक्त कार्यक्रमको प्रायोजक केराबारी गाउँपालिका-२नं. वडा कार्यालय रहेको छ।