सहारा वालग्रामको बिवादित संचालक समितिको नाम सार्वजनिक

सहारा वालग्रामको झण्डै डेढ बिघा जग्गा ब्यक्तिलाई बिक्री गरिएपछि सहाराको संचालक समितिमा को को छन् भन्ने अन्योल भइरहेको बेला नेपाली कांग्रेस बेलबारीले समितिका सबैको नाम सार्वजनिक गरेको छ ।

सहारा काण्डकै बिषयमा बुधबार गरिएको पत्रकार सम्मेलनका क्रममा कांग्रेसले ती नामहरु सार्वजनिक गरेको हो ।
सार्वजनिक गरिए अनुसार सहारा वालग्रामको ७ सदस्यीय समितिमा शिव बराल अध्यक्ष, लक्ष्मण थापा महासचिव र महेन्द्र घिमिरे कोषाध्यक्ष छन् । त्यसैगरी सदस्यहरुमा दुर्गा बराल, भिमराज बस्नेत, तुलसी ओझा र प्रदीप श्रेष्ठ छन् । उनीहरूको समिति कहिले र कसरी बनेको हो अर्थात कति बर्ष भयो भन्नेबारे भने खुलेको छैन ।

त्यसैगरी हर्कमान तामाङ लगायतका केही ब्यक्तिहरु संरक्षक तथा सल्लाहकारको भुमिकामा रहेका र सहाराको जग्गा बिक्री काण्डमा उनीहरूको पनि संलग्नता रहेको कांग्रेसले जनाएको छ ।

सहाराको जग्गा बिक्री काण्डमा संलग्नहरुलाइ नेकपा बेलबारीले संरक्षण गरी चोख्याउने काम गरेको भन्दै कांग्रेस बेलबारीले बुधबार पत्रकार सम्मेलन गरेको थियो । नगरपालिकाको पहलमा सर्वपक्षीय छानबिन समिति गठन गर्न र दोषीलाई कारबाही गर्न कांग्रेसले माग गरेको छ ।

सहाराको जग्गा बिक्री काण्डबारे नेकपा बेलबारीले छानबिन समिति बनाए पनि सहाराका पुर्व अध्यक्ष हर्कमान तामाङ र अध्यक्ष शिव बराललाइ दुई महिनासम्मका लागि निलम्बन गर्ने हास्यास्पद निर्णय गरेको छ । व्यापक बिरोधपछि इटहरीका डम्बर तामाङले किनेको जग्गा उधारोमा संस्थाकै नाममा फिर्ता भइसकेको छ ।