मोरङकै ठुलो ग्रामीण सुधार सामुदायिक वनमा आन्तरिक किचलो, घाटगद्दीमै कुहिन लाग्यो एक करोडको काठ

कानेपोखरी गाउँपालिका–७ स्थित मोरङको सबैभन्दा ठुलो ग्रामीण सुधार सामुदायिक वन उपभोक्ता समुहको करिब एक करोड बराबरको काठ घाटगद्दीमै सडिने अबस्थामा पुगेको छ ।

ग्रामीण सुधार सामुदायिक वन समूहमा भएको आन्तरिक कलहका कारण काठ कुहिने अबस्थामा पुगेको हो । शनिवार वन समूहले प्रेस बिज्ञप्ति जारी गर्दै गलत सूचनाका आधारमा उजुरी परेपछि करिब तीन वर्ष अघिदेखि काठ उपभोक्तालाई वितरण गर्न नपाउँदा काठ घाटगद्दीमै कुहिन लागेको जनाएको छ ।

ग्रामीण सुधार सामुदायिक वन उपभोक्ता समूह क्षेत्र नम्बर ३ को संयोजक शेरबहादुर लिम्बुले २१ लाख रुपैयाँको ‘फर्जी बिल’ मिलाएको भन्दै डिभिजन वन कार्यालय मोरङमा उजुरी गरेको कारण काठ कुहिने अवस्थामा पुग्न लागेको समूहका अध्यक्ष नवीन राईले बताए ।

लेखा समिति संयोजक बिजयगोपाल गड्तौलाका अनुसार काम गर्ने मजदुर तथा उपभोक्ता समेतलाइ भुक्तानी दिनुपर्ने र मूल र क्षेत्रीय समितिको साधारण सभा एवम् विभिन्न सभाहरूको खर्च समेत गरी करिब २१ लाख ऋण छ । पुरानो समितिले सम्पूर्ण हिसाब तरिनुपर्ने दायित्वमा राखिएको संयोजक गड्तौलाले बताए । गत असोजमा भएको साधारणसभाले राइकै नेतृत्वमा दोस्रो कार्यकालका लागि समिति गठन गरेको थियो ।

फर्जी विल भएको नभएको बारे खोजी गरी छलफलबाट प्रस्ट हुन अनुरोध गर्दा पनि  वनकै ३ नम्बर क्षेत्रीय अध्यक्ष शेरबहादुर लिम्बूले उजुरी गरेको र सोही कारण उपभोक्तालाई काठ वितरण गर्न नसकिरहेको मूल समूहको पूर्व उपाध्यक्ष तथा वर्तमान सदस्य कृष्ण थामिले बताए ।

मोरङ जिल्लामै सबभन्दा ठुलो वन ग्रामीण सुधारको ८३९.२२ हेक्टर क्षेत्रफल रहेको छ । यस वनमा क, ख र ग वर्ग गरी ६ हजार उपभोक्ता छन् । आर्थिक वर्ष २०७४/०७५ मा ३२ हजार कि बि साल लगायतको काठ काटेर घाटगद्दीमा राखिएकोमा करिब ११ हजार उपभोक्तालाई वितरण भएपछि किचलो सुरु भएको थियो । उजुरी परेयता करिब २१ हजार कि बि काठ लामो समयदेखि घाटगद्दीमै छ ।

वनले प्रकाशित गरेको प्रेस विज्ञप्तिमा अध्यक्ष नवीन राई, सचिव शान्ता माझी, कोषाध्यक्ष देवेन्द्र थापा, लेखा समिति संयोजक बिजयगोपाल गड्तौला, १ नम्बर क्षेत्रीय समिति संयोजक केदार राई, २ को दीपक लिम्बू, ३ नम्बर क्षेत्रको सहसंयोजक जितबहादुर राईको हस्ताक्षर रहेको छ ।