लोक दोहोरी प्रतिष्ठान कोशी प्रदेशको प्रथम अधिवेशन सम्पन्न, अध्यक्षमा घिमिरे

लोक तथा दोहोरी कलाकारहरूको साझा संस्था राष्ट्रिय लोक तथा दोहोरी गीत प्रतिष्ठान नेपाल कोसी प्रदेशको प्रथम अधिवेशन तथा सांस्कृतिक कार्यक्रम बिराटचोकमा सम्पन्न भएको छ ।
मोरङको विराटचोक स्थित इन्द्रपुर जेसिसको सभाहलमा शनिबार सम्पन्न प्रथम अधिवेशनबाट अध्यक्षमा रोम घिमिरे सर्वसम्मत चयन भएका छन् । घिमिरे यसअघि प्रतिष्ठान प्रदेशको तदर्थ समिति संयोजक थिए।
अधिवेशनले वरिष्ठ उपाध्यक्षमा सरोज आचार्य, प्रथम उपाध्यक्षमा बोधराज पौडेल, द्वितीय उपाध्यक्षमा मिलन दुलाल, महिला उपाध्यक्षमा सरिता राना मगर, सचिवमा सुशील भट्टराई महिला सचिवमा शकुन्तला कार्की, सहसचिवमा डम्बरबहादुर घिमिरे र रवि किरण लिम्बु, कोषाध्यक्षमा टिका बस्नेत र सह कोषाध्यक्षमा तोयानाथ भट्टराईलाई सर्वसम्मत निर्वाचित गरेको छ ।
सर्वसम्मत निर्वाचित सदस्यहरुमा राम नेपाली, शिव नेपाल, दुलहरी घतानी, भोलामान गुरुङ, गङ्गा गौतम, शान्ता तिम्सिना, तेजेन्द्र गन्धर्व, शिवराज भट्टराई छन् ।
कार्यक्रम कोशी प्रदेश प्रमुख परशुराम खापुङको प्रमुख आतिथ्यता र राष्ट्रिय लोक तथा दोहोरी गीत प्रतिष्ठान नेपालकी केन्द्रीय अध्यक्ष रिता थापा मगर, सांगठनिक उपाध्यक्ष सुबास के सी र महासचिव शिव हमालको बिशेष आतिथ्यता थियो । कार्यक्रममा प्रतिष्ठानका संस्थापक केन्द्रीय सदस्य देवी दुलाल वर्तमान कार्यसमितिका केन्द्रीय सदस्य रमेश आचार्य लगायतको आतिथ्यता थियो।लोक तथा दोहोरी गीत प्रतिष्ठान नेपाल कोशी प्रदेश तदर्थ समितिका अध्यक्ष रोम घिमिरेको अध्यक्षतामा भएको कार्यक्रममा विभिन्न गायक गायिकाहरुले गीतहरू गाएर दर्शकहरूलाई पनि नचाएका थिए। कार्यक्रममा किराँत राई यायोख्खा सुन्दरहरैंचाको तर्फबाट साकेला नृत्य र नेपाल मगर संघ केराबारीको टोलीले मगर संस्कृतिमा आधारित हुर्रा गीतसहित नृत्य प्रस्तुत गरेका थिए ।
कार्यक्रममा लोक तथा दोहोरी गीत प्रतिष्ठानका जिल्ला अध्यक्षहरू जिल्लाबाट छनोट भएर आएका प्रतिनिधिहरू र गीतसगीत प्रेमी दर्शकहरूको उपस्थिति थियो।
उद्घाटन कार्यक्रममा प्रतिष्ठान कोशी प्रदेशकी कोषाध्यक्ष टिका बस्नेतले स्वागत मन्त्तब्य प्रतिष्ठानका कोशी प्रदेश सचिव सुशील भट्टराईले कार्यक्रमको सञ्चालन गरेका थिए।