स्थानीय सरकारलाई दलीय सिण्डिकेटमुक्त बनाउन जुट्दै स्वतन्त्र उम्मेद्वारी अभियान

‘अबको स्थानीय सरकार, ७५३ वटै स्थानीय तहमा स्वतन्त्र उम्मेद्वार’ को मुख्य नारासहित स्वतन्त्र उम्मेदवारी अभियानले स्थानीय तह दलीय राजनीतिमुक्त बनाउने अभियान थालेको छ।

स्वतन्त्र उम्मेद्वारी अभियानमार्फत हालसम्म १ हजार ९ सय ९८ जनाले स्थानीय तहको निर्वाचनमा उम्मेद्वारी घोषणा गरेका छन् । जसअन्तर्गत प्रदेश–१ मा ३ सय ४७ जना, मधेश प्रदेशमा ३ सय ९ जना, बागमती प्रदेशमा ३ सय ६४ जना र गण्डकी प्रदेशमा २ सय ८६ जनाले उम्मेद्वारी घोषणा गरेका छन् । त्यसैगरी लुम्बिनीमा २ सय ६५ जना, कर्णालीमा १ सय ८८जना र सुदूरपश्चिम प्रदेशमा २ सय ३९ जनाले स्वतन्त्र उम्मेदवारी घोषणा गरेका छन् ।

देशभरबाट हालसम्म कूल ४ हजार ६ सय ५७ जनाले उम्मेद्वारी हुने इच्छासहितको फारम भरेको स्वतन्त्र उम्मेदवारी अभियानले जनाएको छ ।

स्थानीय तहमा स्वतन्त्र उम्मेदवार दिन तयार भएका स्वच्छ छवि, नैतिक र इमान्दार जो कोही पनि यो अभियानमा जोडिन सक्नेछन् । स्थानीय तह भ्रष्टाचारमुक्त हुनुपर्ने, जनताका दैनन्दिन आवश्यकता पूरा गर्नुपर्ने, विकासका एजेण्डालाई प्राथमिकता दिनुपर्ने भन्दै अभियानले स्थानीय सरकार दलीय हुँदा विकासका मुद्दा ओझेलमा परेको, जनताका आवश्यकता पूरा नभएको दाबी गरेको छ ।

चुनावमा हुने करौडौं खर्चको विरोधकै लागि अभियानले यही हप्ता सडकमै पत्रकार सम्मेलन गरेको थियो ।
अभियानले कसरी काम गर्छ ?
अभियानले तीन तहमार्फत आफ्नो अजेण्डा जनता समक्ष लैजाने छ । पहिलो तहमा मेन्टर वा सल्लाहकार रहनेछन् । यसमा स्थानीय सरकार सञ्चालन, पूर्वाधार, शिक्षा, स्वास्थ्य लगायत क्षेत्रका विज्ञ रहनेछन् । दोस्रो तहमा कार्यकारी समिति रहनेछ । यसले उम्मेद्वार र अन्य आवश्यक संयन्त्र जस्तै– संघसंस्था, सञ्चार माध्यमबीचको पुल बनेर व्यवस्थापनको काम गर्नेछ । तेस्रो तहमा कर्मचारी र स्वयम्सेवकहरू रहनेछन् । यो तहमा रहनेले विभिन्न तहसँग सम्पर्क, समन्वय गर्ने, कामको डिजाइन र कार्यान्वयनमा लैजान सघाउने छ ।