लेटाङमा व्यावसायिक कफी खेती फस्टाउँदै

मोरङको लेटाङ नगरपालिका वडा नं. १ का कृषकहरु व्यावसायिक कफी खेतीतर्फ आकर्षित हुन थालेका छन् ।
हाल करिब एक हजार रोपनी क्षेत्रफलमा फैलिएको कफी खेतीमा एक लाखभन्दा बढी बिरुवा लगाइएको छ। यस खेतीमा २०० घरधुरी किसानहरू सक्रिय छन् ।

वडा अध्यक्ष बिष्णु कुमार मगरका अनुसार, २०८० सालमा १५०० केजी कफी उत्पादन गरिएको थियो । सो कफी प्रतिकिलो रु. ५३५ मा बिक्री गरिएको थियो। यस्तै, २०८१ मा २० हजार केजी कफी उत्पादन गरिने अपेक्षा गरिएको मगर बताउँछन् ।

वडास्तरमा गठित अनुगमन टोलीले कफी खेतीको अवस्थाबारे अध्ययन गरेको थियो । टोलीमा वडा अध्यक्ष विष्णु कुमार मगर, अगुवा कृषकहरू, र विभिन्न राजनीतिक दलका प्रतिनिधिहरूको सहभागीता थियो। टोलीले कफी खेतीको वर्तमान अवस्था, रोगकिरा व्यवस्थापन, र सिँचाइको समस्याबारे जानकारी लिएको छ।
किसानहरूले रोगकिरा व्यवस्थापन, सिँचाइ अभाव, र आधुनिक कृषि प्रविधि नपाउँदा खेतीमा कठिनाइ भएको बताएका छन्। यसलाई ध्यानमा राख्दै वडा कार्यालयले किसानलाई कफी खेतीसँग सम्बन्धित आधुनिक प्रविधि र व्यवस्थापनका बारेमा प्रशिक्षण प्रदान गर्ने, सिँचाइ प्रणालीको सुधार र व्यवस्थापनमा विशेष पहल गर्ने, र रोगकिराको पहिचान तथा समाधानका लागि कृषिविज्ञहरूको सहकार्यमा ठोस योजना बनाउने तयारी गरेको छ।

लेटाङको कफी खेतीले कृषिमा आत्मनिर्भरता र आर्थिक समृद्धिको ढोका खोल्ने विश्वास गरिएको छ। स्थानीय कृषकहरूको सामूहिक प्रयास, वडाको प्रोत्साहन, र बजारमैत्री उत्पादनका कारण लेटाङ व्यावसायिक कफी उत्पादनको उत्कृष्ट क्षेत्रका रूपमा स्थापित हुँदै गएको छ । कफी खेतीले स्थानीय अर्थतन्त्रलाई बलियो बनाइ लेटाङलाई राष्ट्रिय र अन्तर्राष्ट्रिय कफी बजारमा चिनाउन पनि महत्वपूर्ण भूमिका खेल्ने बिश्वास गरिएको छ ।