तेह्रथुमका सबै स्थानीय तहमा एमालेविरुद्ध मोर्चाबन्दी गर्दै सत्तापक्षीय दलहरू

सत्तारूढ गठबन्धन सम्बद्ध पार्टीहरुले स्थानीय चुनावमा तेह्रथुममा पनि एमालेविरूद्ध मोर्चाबन्दी गर्ने निर्णय गरेका छन् ।

एक साताअघि धनकुटामा वडा तहसम्मै तालमेल गर्ने निर्णय गरेका गठबन्धनका दलहरु नेपाली कांग्रेस, नेकपा माओवादी केन्द्र, नेकपा (एकीकृत समाजवादी) र जनता समाजवादी पार्टी र मञ्चसम्बद्ध लिम्बुवान पार्टी नेपालले तेह्रथुम जिल्लामा तालमेल गर्ने निर्णय गरेका हुन्। धनकुटामा लिम्बुवान पार्टी भने गठबन्धनमा सामेल थिएन ।

२०७४ को स्थानीय तह निर्वाचनमा  तेह्रथुममा एउटाबाहेक अरू सबै स्थानीय तहमा एमाले विजयी भएको थियो।

तेह्रथुममा दुई नगरपालिका र चार गाउँपालिकासहित ६ वटा स्थानीय तह छन्। २०७४ को स्थानीय चुनावमा म्याङलुङ नगरपालिकासहित आठराई गाउँपालिका, छथर, फेदाप र मेन्छ्यायेम गाउँपालिका एमालेले र लालीगुराँस नगरपालिकामा कांग्रेसले जितेको थियो।

तेह्रथुममा तालमेल गर्ने निर्णयमा कांग्रेस जिल्ला सभापति अर्जुन तुम्बाहाम्फेसहित माओवादी केन्द्रका संयोजक इन्द्रबहादुर इम्सङ, एकीकृत समाजवादीका अध्यक्ष कृष्ण चोङबाङ, जसपाका अध्यक्ष भगवान रिजाल र लिम्बुवानका तर्फबाट विजय निलेकुले हस्ताक्षर गरेका छन् ।