जाँतेले जित्यो फाइवामा भएको खुल्ला वडास्तरीय महिला भलिबलको उपाधि 

मोरङको केराबारी गाउँपालिका २ फाइबा स्थित द्वितीय मेला बजार तथा खेलकुद ब्यबस्थापन समिति को आयोजनामा भएको खुल्ला वडास्तरीय महिला भलिबलको उपाधि जाँतेले जितेको छ ।

लेटाङ नगरपालिका ९ स्थित जाँते महिला भलिबल टीम र लेटाङ १ को साग्मा महिला भलिबल टीमबिच आइतबार भएको फाइनल भलिबल खेलमा साग्मालाई २-० को को सोझो सेटमा पराजित गर्दै जाँतेले उपाधी उचालेको हो । पहिलो खेलमा  १७ – २५ को नतिजा जिकालेको जाँतेलाइ दोस्रो खेलमा साग्माले खेल प्रतिस्पर्धात्मक बनाएपनि जाँतेले  २५  – २३  को नतिजा निकाल्दा तेस्रो खेल खेल्नै परेन । उपाधिसँगै जाँतेले शिल्ड र प्रमाणपत्रसहित नगद १० हजार पाएको छ भने साग्माले ५ हजारमा चित्त बुझाउनुपरेको छ ।

जवान युवतीहरुको बाहुल्यता रहेका दुवै टीमको प्रदर्शन रोचक र हेर्न लायक भए पनि जाँते को अगाडि साग्मा निरीह साबित भयो । पाँच-छ घण्टाको पैदल हिँडेर खेलस्थल फाइबा पुगेको जाँतेका युवतीहरुको टीम र साग्मा को फाइनल खेल हेर्न करिब डेढ दुइ सय दर्शक उपस्थित थिए ।

प्रतियोगितामा आयोजक दुई टीम र साग्मा र जाँते गरी ४ टीम सहभागी रहेको द्वितीय मेला बजार तथा खेलकुद ब्यबस्थापन समितिका अध्यक्ष तथा खेलकुद बिकास समिति केराबारी २ का अध्यक्ष देवीलाल लिम्बूले जानकारी दिए । महिला भलिबलका बिजेता र उपबिजेतालाई आइतबार नै केराबारी २ का वडाध्यक्ष प्रेम लिम्बुले पुरस्कार बितरण गरेका छन् ।

कार्तिक ३० गतेदेखि फाइबामा महिला तथा पुरुष भलिबल प्रतियोगितासँगै हरेक बर्ष लाग्ने ऐतिहासिक द्वितिया मेला पनि लागिरहेको छ ।

त्यसैगरी आइतबार भएको पुरुष भलिबल प्रतियोगिताको क्वाटर फाइनल खेलमा बेलबारी ८ राधानगर र लेटाङ ७ वाराङ्गी सेमिफाइनलमा पुगेका छन्  । लेटाङ ७ फुर्केटारलाई २-० को सोझो सेटमा पराजित गर्दै बेलबारी ८ राधानगर र चौबिसे स्पोर्टिङ, चौबिसे २ लाई २-० कै नतिजामा पराजित गर्दै  लेटाङ ७ वाराङ्गी सेमिफाइनलमा पुगेका हुन् । यसअघि आयोजक टीम सेमिफाइनलमा पुगिसकेको छ भने सोमबार डाँडाबजार र समेवाबिच हुने अन्तिम क्वाटरफाइनल खेलको बिजेता सेमिफाइनलमा पुग्नेछ ।

जारी खुल्ला वडास्तरीय  पुरुष भलिबल प्रतियोगितामा मोरङ र धनकुटाका कुल २० वटा भलिबल टीम सहभागी थिए ।  सो प्रतियोगिताका सेमिफाइनल र फाइनल खेल सोमबार हुने आयोजकले जनाएका छन् ।