विभिन्न कार्यक्रमसहित सिंहदेवी सामुदायिक वनको १९ औं बार्षिक साधारणसभा सम्पन्न

सिंहदेवी सामुदायिक वन उपभोक्ता समूह केराबारी ९ को १९ औं बार्षिक साधारणसभा विभिन्न कार्यक्रमसहित सम्पन्न भएको छ ।
केराबारी गाउँपालिकाकी उपाध्यक्ष मनमाया मगरको प्रमुख आतिथ्यता र डिभिजन वन कार्यालय मोरङाका प्रमुख उत्सव थापा को विशेष आतिथ्यतामा भएको कार्यक्रममा देवीझोडास्थित वनको आफ्नै भवनमा शनिबार साधारणसभा सम्पन्न भएको हो । वनका अध्यक्ष भिम कार्कीको अध्यक्षतामा भएको कार्यक्रममा सब डिभिजन वन कार्यालय सलकपुर तथा केराबारीका वन अधिकृत गोपाल दाहाल, केराबारी ९ का वडाध्यक्ष गोपाल याख्खा, देवीझोडा सामुदायिक वनका अध्यक्ष गोबिन्द बस्नेत, बुद्ध माद्यमिक विद्यालय केराबारीका प्रधानाध्यापक छवि धमला लगायत वनका पुर्व अध्यक्ष एवम् पदाधिकारी तथा विभिन्न संघ संस्थाका प्रतिनिधिहरुको उपस्थिति थियोे ।
उपभोक्ताहरुको उल्लेख्य उपस्थितिमा भएको साधारणसभाको कार्यक्रममा स्थानीय बुद्ध माविका विद्यार्थीहरुले विभिन्न नृत्यहरु प्रस्तुत गरेका थिए । विद्यार्थी हरुली वन सचेतना सम्बन्धी नाटक पनि प्रस्तुर गरेका थिए । साधारणसभाको केराबारी गाउँपालिकाकी उपाध्यक्ष मनमाया मगरले पानसमा बत्ती बालेर उद्घाटन गरेकी थिइन् ।
साधारणसभामा वन समुहका अध्यक्ष भिम कार्कीले प्रगति प्रतिवेदन तथा भावी योजना पेश गरेका थिए । प्रतिवेदनमा उल्लेख भए अनुसार सामुदायिक वनले आर्थिक बर्ष २०८०/०८१ को अबधिमा वनले ६६ लाख ७३ हजार ९ सय रुपैयाँ ६६ पैसा आम्दानी र खर्च गरेको थियो ।
सामुदायिक वनले गत बर्ष झाडी सरसफाइ, चोरी तस्करी तथा डढेलो नियन्त्रण, भवन मर्मत तथा फर्निचर निर्माण, बिपन्नलाई निशुल्क स्वास्थ्य बीमा, उपभोक्ताहरुलाइ प्राणघातक रोग उपचार सहयोग, विद्यार्थीहरुलाइ पोषाक, युवाहरूलाई खेलकुद सामग्री बितरण जस्ता काम गरेको अध्यक्षको प्रतिवेदनमा उल्लेख छ ।
साधारणसभामा वनका सचिव गोबिन्दप्रसाद (ज्ञानु) बास्तोलाले सांगठनिक् प्रतिवेदन र कोषाध्यक्ष मनिषा सुवेदीले अर्थिक प्रतिवेदन प्रस्तुत गरेकी थिइन् । त्यस्तै लेखा संयोजक बिनोद सुवेदीले आन्तरिक लेखा प्रतिवेदन प्रस्तुत गरेका थिए । कार्यक्रममा उपाध्यक्ष दिपा बास्तोलाले स्वागत मन्तव्य व्यक्त गरेकी थिइन् भने सह- सचिव दिलबहादुर केसीले कार्यक्रम संचालन गरेका थिए ।
बार्षिकोत्सवको अबसरमा पाँच पाँच जना वृद्ध वृद्धाहरुलाइ सम्मान गरिएको छ । सम्मानित हुने वृद्धहरुमा लोकनाथ कोइराला, मणिलाल फुयल, सुर्यप्रसाद भट्टराई, मानबहादुर राई र कृष्ण ब. थापा छन् । सोही अबसरमा वृद्धाहरु शान्तीदेवी पोखरेल, मनमाया दास, तुलसा कार्की, तेजरुपा बराल र लक्ष्मीमाया बस्नेतलाई पनि सम्मान गरिएको छ ।
वनको साधारणसभामा कृषकहरु खगेन्द्रप्रसाद लामिछाने, अस्मिता कार्की र अमरबहादुर खड्कालाई कदरपत्र र उपहारद्वारा र नृत्य तथा नाटक प्रस्तुत गर्ने बुद्ध माविका विद्यार्थीहरुलाई पनि कदरपत्रद्वारा सम्मान गरिएको थियो ।
कार्यक्रममा बोल्दै प्रमुख अतिथि केराबारी गाउँपालिकाकी उपाध्यक्ष मनमाया मगरले सिंहदेवी सामुदायिक वनले धेरै सामाजिक कामहरू गरेको बताइन् । रबर खेतीका लागि गाउँपालिकाले ५० प्रतिशत साझेदारीमा बिरुवा उपलब्ध गराइरहेको उल्लेख गर्दै उपाध्यक्ष मगरले बहुमुल्य र बन्यजन्तुमैत्री बोटबिरुवा लगाउन सामुदायिक वनहरुलाइ सुझाव दिइन् ।
डिभिजन वन कार्यालय मोरङाका प्रमुख उत्सव थापा, देवीझोडा सामुदायिक वनका अध्यक्ष गोबिन्द बस्नेत, बुद्ध माद्यमिक विद्यालय केराबारीका प्रधानाध्यापक छवि धमला, केराबारी ९ का वडाध्यक्ष गोपाल याख्खा लगायतले पनि मन्तव्य व्यक्त गरेका थिए । कार्यक्रममा बोल्दै वडाध्यक्ष याख्खाले एक दुई बर्षयता केराबारी ९ मा सामुदायिक वनहरुसँगको सहकार्यमा सडक बत्ती जडान गर्ने लगायतका कार्यक्रम गर्दै आएको र भविष्यमा पनि त्यस्ता कार्यक्रमले निरन्तरता पाउने बताए ।
कार्यक्रममा वन अधिकृत गोपाल दाहालले स्थानीय हहहरुले वन तथा वातावरण ऐन बनाएर वन वातावरण शाखाको समेत ब्यबस्थापन गर्नुपर्ने बताए । सामुदायिक वनहरुले असोज मसान्तभित्र साधारणसभा गरिसक्न उनले आग्रह गरे ।
साधारणसभाको अन्त्यमा उपस्थित उपभोक्ताहरुको लागि चिठ्ठा कार्यक्रम समेत गरेको थियो ।
साधारणसभामा दिइएको जानकारी अनुसार वनले गत बर्ष उपभोक्ताहरुलाइ ३ हजार १ सय ८७ दशमलव ५० क्युफिट फिट साल, एक हजार क्युबिक फिट करम, जमुना जस्ता काठ र एक हजार क्युबिक फिट अन्य प्रजातिका काठ र ८ चट्टा दाउरा बिक्री गरेको थियो । त्यसैगरी घाटगद्दीमा २ सय ८२ क्युबिक फिट सालका काठ, ५ सय ७३ क्युबिक फिट असना र करम र ३ सय ६७ क्युबिक फिट अन्य काठ र झन्डै ३ चट्टा दाउरा मौज्दात रहेको वनले जनाएको छ । वनका लागि डिभिजन वन मार्फत प्रदेश सरकार र वडा कार्यालयले गरी ५ लाख रुपैयाँ प्राप्त भएको थियो ।
कूल दुई सय ५० दशमलव ९८ हेक्टर क्षेत्रफल ओगटेको वन अन्तरगत ३ सय ५० घरधुरी उपभोक्ता छन् ।