विभिन्न कार्यक्रम सहित नोबेल हस्पिटलले भब्य रूपमा मनायो १४ औं बार्षिकोत्सव

बिराटनगरमा अबस्थित नोबेल मेडिकल कलेज टिचिङ्ग हस्पिटलले १४ औं बार्षिकोत्सवको अबसरमा विभिन्न कार्यक्रम गरेको छ ।
हस्पिटलले बार्षिकोत्सवको अवसरमा उत्कृष्ट कर्मचारी र बिद्यार्थीलाई पुरस्कृत गरेको छ । बुुधबार भएको बार्षिकोत्सव कार्यक्रममा अस्पतालले उत्कृष्ट कर्मचारी र बिद्यार्थीलाई पुरस्कृत गरेको छ ।

उत्कृष्ट कार्यसम्पादन गर्ने २० जना कर्मचारी र उत्कृष्ट अंकसहित उत्रिर्ण हुने २४ जना बिद्यार्थीलाई बार्षिकोत्सवको अवसरमा सम्मान एवं पुरस्कृत गरिएको हस्पिटलले जनाएको छ  ।

कार्यक्रममा बिराटनगर महानगरपालिकाका प्रमुख भीम पराजुली, नोबेल अस्पतालका अध्यक्ष लोेकनाथ न्यौपाने, सञ्चालक डा.सुनिल शर्मा, प्रवन्ध निर्देशक इन्दिरा शर्मा, अस्पतालका प्रमुख कार्यकारी अधिकृत डा.भोगेन्द्र प्रसाद आचार्य, प्राचार्य डा.रामहरी घिमिरे, अस्पताल निर्देशक डा.राजेश नेपाल लगायतले उनीहरुलाई पुरस्कृत गरेका थिए ।

कार्यक्रमलाई संबोधन गर्दै बिराटनगर महानगरपालिकाका प्रमुख भीम पराजुलीले नोबेल शिक्षण अस्पताल स्वास्थ्य र शिक्षा क्षेत्रमा उदाहरणीय बन्दै गएको बताए ।
नोबेल अस्पताल उपचारका क्षेत्रमा फड्को मार्दै गएको भन्दै उनले शिक्षा क्षेत्रमा पनि सर्वोत्कृष्ट नजिता ल्याउँदै उत्कृष्ट सस्थाको रुपमा स्थापित भएको उल्लेख गरे । ‘स्वास्थ्य र शिक्षा दुबै क्षेत्रमा नोबेल अस्पताल उदाहरणीय छ ।’ उनले भने ‘उदाहरणीय भएकै कारण नोबेल अस्पताल सवैका लागि गर्व गर्न लायक बनेको छ ।’ नोबेलले पाउँदै गएको सफलताको प्रशंसा गर्दै महानगर प्रमुख पराजुलीले अझ सफलताको शुभकामना पनि दिए ।
कार्यक्रममा प्रदेशसभा सदस्य केदार कार्कीले नोबेल अस्पताल १ नम्बर प्रदेशको मात्र नभई मुलुककै गर्व गर्न लायक सस्था बनेको जिकिर गरे । नोबेल गरिब र बिपन्न बिरामीको सहाराको रुपमा रहेको भन्दै नेता कार्कीले नोबेललाई संजिवनी पहाडको संज्ञा पनि दिए ।

नोबेल अस्पताल सञ्चालक डा.सुनिल शर्माले स्वास्थ्य र शिक्षा क्षेत्रमा रेकर्ड ब्रेक गर्दै आएको नोबेललाई विश्वकै उदाहरणीय बनाउने बताए । सफलता हासिल गर्ने क्रममा नोबेलले धेरै रेकर्ड व्रेक गरिसकेको भन्दै डा.शर्माले अब नोबेललाई विश्वकै उदाहरणीय संस्थाको रुपमा स्थापित गर्ने बताए ।
नोबेलको न्यूरो सर्जरी सेन्टर नेपालकै नमुना रहेको बताउँदै डा.शर्माले यसरी नै सबै बिभागलाई विकास गर्दै अघि बढ्ने जानकारी दिए । नोबेलले विश्वविद्यालयको रेकर्डमा लगातार तीनबर्ष नेपाल टप गरेको स्मरण गराउँदै डा.शर्माले नेपालमै बढी कर तिरेर हालै नोबेल पुरस्कृत हुन पाएकोमा खुःशी पनि व्यक्त गरे ।