नेपाली कलाकारहरुको जमघटसहित युएईको अलएनमा ल्होसार विशेष कार्यक्रमको तयारी

अलएन, युएई /  जाडाेले छपक्ककै छोपेको युएईकै अलएन सहरको चिसो मौसमलाई तताउन नेपाली कलाकारहरु जम्मा हुन लागेका छन् ।

युएईको अलएन शहर आफैमा हरियाली र शान्त छ । त्यही शान्त वातावरणमा “नेपालीका लागि नेपाली” भन्ने मुल नाराका साथ स्थापना भएको एनआरएनए युएई, क्षेत्रीय समन्वय परिषद अलऐन एक रमाइलो कार्यक्रमका साथमा आगामी ८ फेब्रुअरी शुक्रबार नेपालीहरुलाई तताउने तयारी गरिरहेको छ ।
नेपालीहरूको बहु सॉस्कृतिक धरोहरलाई जीवन्त राख्ने सोचलाई अघि बढाउदै नेपाली चाडपर्वहरुको अवसरमा बिभिन्न कार्यक्रमहरु सन्चालन गर्ने क्रमलाई निरन्तरता दिदै अलऐनले ल्होसारको अवसर पारी गर्ने ल्होसार साँझ – २०७५ कार्यक्रमको तयारी पुरा भएको छ ।

कार्यक्रममा युएईमै रोजगारी गर्दै आईरहेका चिरपरिचित कलाकारहरुको बिशेष प्रस्तुती समेत रहनेछ ।
अलऐनको टप ५ रेस्टुरेन्टमा सम्पन्न हुने कार्यक्रममा विभिन्न नेपाली खानाका परिकारको साथमा गायक पारस लामा, गायिका सानू स्मिथ,सुरेन्द्र लामा,प्रशान्त ताजपुरिया र जनक रुचाल, नृत्यगंना नेमिका गुरूंग, अर्मिला लोप्चन, पुजा रेग्मि, अस्मीता गिरीको प्रस्तुती रहनेछ साथै नेपाली बाल मन्च, अलएनका कलाकारहरु सौभाग्य, सम्पुर्ण र आर्यनको विशेष प्रस्तुती रहने एनआरएनए युएई, क्षेत्रीय समन्वय परिषद अलऐनका सचिव तथा कार्यक्रम संयाेजक जिवन योन्जनले बताए । एनआरएन अलएनका अध्यक्ष गोपाल पौडेलले कार्यक्रमलाई सफल पारी रमाइलो अनुभुती गर्नका लागि युएईमा रहेका इच्छुक नेपालीहरुलाई आउन निम्तो गरेका छन् ।