बेलबारी साहित्य पुरस्कारबाट बिरही र बेलबारी कला पुरस्कारबाट लामा सम्मानित

बेलबारी साहित्य बिकास समितिले रु. २५ हजार पुरस्कार राशीको बेलबारी साहित्य पुरस्कार’ बाट साहित्यकार केशु विरही र रु. १५ हजार नगद राशी भएको बेलबारी कला पुरस्कार’ बाट ललितकलाकार गणेश लामा ‘आँसु’ लाई सम्मानित गरेको छ ।

बेलबारी साहित्य बिकास समितिको छैठौं बार्षिकोत्सवको अबसरमा बिरही र लामालाई नगद र सम्मानसहित पुरस्कृत गरिएको हो ।

कथा, उपन्यास, बालसाहित्य तथा अनुसन्धानमुलक कृतिका क्षेत्रमा कलम चलाउँदै आएका विरहीका कहालीलाग्दा गोरेटाहरू (उपन्यास) सहलेखन –२०५६, आमाको माया (उपन्यास) –२०५७, दन्किएको आगो (गजल सङ्ग्रह) –२०६३, सुस्केरा (संयुक्त साहित्यिकसङ्ग्रह) –२०६३, भास्कर वंशावली (वंशावली) –२०६५, सुलोचना (कथासङ्ग्रह) –२०७१, रेस्माको स्यान्डल (बालकथासङ्ग्रह) –२०७७ आदि विधा साहित्यका कृति प्रकाशित भइसकेका छन् भने २०७९ मा अनुसन्धानात्मक कृति बेलबारीको साहित्यिक इतिहास प्रकाशित भएको छ ।
लामा विगत लामो समयदेखि कला (आर्ट्स) का माध्यमबाट योगदान दिँदै आएका व्यक्ति हुन् ।

संस्थाले बेलबारीमा साहित्य र कलाका क्षेत्रमा विशेष योगदान दिने एक एक जनालाई स्रष्टा तथा कलाकारलाई सम्मानित गर्दै आएको छ । यसअघि बेलबारी साहित्य सम्मानबाट रमेश लामा, हर्कमान तामाङ र इरान राई सम्मानित भइसकेकका छन् भने बेलबारी कला सम्मानबाट श्याम गौतम, शिव छाङ्छा राई र मेघबहादुर कार्की सम्मानित भइसकेका छन् ।

‘बेलबारी साहित्य पुरस्कार’ हर्कमान तामाङ, रमेशकुमार तामाङ र ईरानराईलाई प्रदान गरिसकिएको थियो भने ‘बेलबारी कला पुरस्कार’ श्याम गौतम, शिव छाङ्छा राई र मेखराज कार्कीलाई प्रदान गरिसकिएको छ ।

स्कुले बालबालिकालाई भाषा–साहित्यतर्फ प्रोत्साहित गर्न आयोजना गरिएको ‘बालकविता तारा’ वीरेन्द्र मावि, बेलबारी–६ की छात्रा भावना तामाङलाई रु. ५ हजारसहित पुरस्कृत गरिएको छ ।

प्रतियोगितामा उत्कृष्ट बालकविहरूलाई क्रमश: रु. ४ हजारसहित दोस्रो कसेनी मावि, बेलबारी–४ का छात्र सोलोमन राई, रु. ३ हजारसहित तेस्रो मोरङ चिनारी, बेलबारी–२ की छात्रा जेनिसा कार्की र रु. १ हजारसहित सान्त्वना जनता मावि बेलबारी–१ की छात्रा मनिका बराललाई पुरस्कृत गरिएको छ ।

निवर्तमान अध्यक्षले संस्थालाई दिइन् ५० हजार सहयोग 

बेलबारी साहित्य बिकास समितिकी निवर्तमान अध्यक्ष तिला लेकालीले संस्थाको  कोषमा ५० हजार रुपैयाँ सहयोग गर्नुभएको छ । छैठौं साधारणसभाको अबसरमा लेकालीले सो सहयोग गर्नुभएको हो ।