केराबारीमा क्रसरको खाल्डोमा डुबेर दुइ नाबालकको मृत्यु, पैसा दिने शर्तमा घटना गुपचुप 

मोरङको केराबारी गाउँपालिका–८ स्थित कृष्ण क्रसिङ इण्डष्ट्रिजको खाल्डोमा डुबेर नाबालक दाजुभाइको मृत्यु भएको घटना पैसा दिने सर्तमा गुपचुप पारिएको छ ।
क्रसर परिसरको खाल्डोमा जमेको पानीमा डुबेर केराबारी–८ का तोयानाथ चौलागाईंका छोराहरु ६ वर्षीय रामचरण र ८ वर्षीय भूपेन चौलागाईंको बिहीबार मृत्यु भएको थियो । क्रसरको चरम लापर्बाहीले एउटै परिवारका २ नाबालकले ज्यान गुमाएको गम्भीर एवं पीडादायी तथ्यलाई लुकाएर २६ लाख दिने सर्तमा घटना मिलाइएको छ ।
घटनाका विषयमा शुक्रबार केराबारी गाउँपालिका कार्यालयमा सर्वपक्षीय छलफल भएको थियो । छलफलमा गाउँपालिका अध्यक्ष सुमन मिरिङचिङ, उपाध्यक्ष मनमाया मगरलगायतका जनप्रतिनिधि, पीडित पक्ष, क्रसरका संचालक एवं गाउँपालिकाका पूर्वअध्यक्ष रोहित कार्कीसहित क्रसर व्यवसायीका प्रतिनिधि, प्रहरीलगायत उपस्थित थिए ।
सहमति अनुसार क्रसर सञ्चालकले क्षतिपुर्ति नदिए क्रसर सिल गर्ने गाँउपालिका अध्यक्ष सुमन मिरिङ्चिङले प्रतिबद्दता गरेपछि शव उठाईएको हो । कृष्ण क्रसर उद्योगको खाल्डोमा डुबेर आमजुँगी आधारभुत बिद्यालयमा शिशु कक्षामा अध्ययनरत दाजुभाइ ६ बर्षिय रामचरण र १० बर्सिय भुपेन्द्र चौलागाँइको एकै खाल्डोमा डुबेर मृत्यु भयको थियो।
सहमतिपछि शव पोस्ट्मार्टमका लागि हस्पिटल लगिएको छ । क्रसर सञ्चालकको लापरबाहीले मृत्यु भएको भन्दै स्थानिय आक्रोसित बनेका थिए ।