थप द्वन्द्व निम्त्याउँदै बेलबारी नगरपालिका, ‘अराजक समुह’ को संज्ञा दिँदै प्रहरीमा उजुरी
- १८ असार २०८२, बुधबार
बेलबारी नगरपालिकाले ‘अराजक समुह’ लाई कारबाहीको माग गर्दै ईलाका प्रहरी कार्यलय बेलबारीमा उजुरी दिएको छ ।
नगरपालिकाले बिभिन्न शिर्षकमा गरेको खर्चको बिवरण उपप्रमुख नितु थापा (कोईराला) ले माग गर्दा लेखा प्रमुख धनमाया राईले हिसाब हेर्न नमिल्ने बताएको घटना सार्वजनिक भएपछि असार १२ गते नगरले गरेका बिभिन्न शिर्षकका खर्चहरु हेर्न माग गर्दै बेलबारीका बिभिन्न वडाका नगरबासीहरु नगरपालिकामा पुगेका थिए ।
उनीहरुलाई गेटमै नगर प्रहरीले रोकेपछि थप आक्रोशित भएका युवाहरुको समूहले लेखा प्रमुखको कार्यकक्षमा तालाबन्दी गर्ने प्रयास गरेको थियो । सोही क्रममा नगर प्रमुख दिलप्रसाद राई र त्याँहा भेला भएका नगरबासीहरु बिच पनि घम्साघम्सी भएको थियो ।
बेलबारी नगरपालिकाले त्यहि भेला भएका नगरबासीहरुलाई ‘अराजक समुह’ को संज्ञा दिँदै मंगलबार कारबाहीको लागि उजुरी दिएको छ । ईलाका प्रहरी कार्यलय बेलबारीका प्रमुख ईन्स्पेक्टर कृष्णबहादुर खत्रीका अनुसार बेलबारी नगरपालिकाको लेटरप्याडमा ‘अराजक समुह’ लाई कारबाही गर्नुपर्ने माग सहितको उजुरी परेको छ । उजुरीका साथ घटनाको भिडियो पेस गरिए पनि कसैको नाम उल्लेख छैन । । कस्लाई र के कारबाही गर्ने भन्ने बिषयमा स्पष्ट भईनसकेको र कानुनी परामर्श भईरहेको ईन्स्पेक्टर खत्रीले बताए ।









