सामुहिक बलात्कारमा परिन् मोरङ लेटाङकी वालिका, बलात्कार गर्ने एउटा केटो पक्राउ

मोरङको उर्लाबारी नगरपालिका ३ मंगलबारेस्थित थापा चौकका तीनजना युवाले मोरङकै लेटाङकी एक बालिकालाई सामुहिक बलात्कार गरेका छन् ।

लेटाङ नगरपालिका घर भएकी १३ वर्षीय बालिकालाई झुक्याएर उर्लाबारीस्थित घरमै लगेर उनीहरूले रातभर बलात्कार गरेको तीनदिनपछि सार्वजनिक भएको हो । बलात्कारमा संलग्न युवाहरमा रेवत भनेर चिनिने २५ वर्षीय चन्द्रमणि आचार्य, हजेम्स क्षेत्री, रेगन छन् ।

‘गिफ्ट’ ल्याइदिएको छु भन्दै मोरङको कानेपोखरीमा बोलाएर आफ्नो मोटरसाइकलमा राखेर आचार्यले बालिकालाई आफ्नै घरमा पु¥याएर बलात्कार गरेको  प्रहरीको अनुसन्धानबाट खुलेको छ । बलात्कारमा संलग्न मध्ये आचार्यलाई प्रहरीले मंगलबार मोरङको मिक्लाजुङबाट  पक्राउ गरेको छ ।

प्रहरीका अनुसार एक रेडियो कार्यक्रममार्फत बालिका र आचार्यबीच चिनजान भएको थियो । त्यही चिनजानका आधारमा आचार्य गत शुक्रबार बालिकालाई भेट्न भन्दै लेटाङमै पुगेका थिए । त्यसदिन दुई जनाबीच पहिलो भेटघाट भएको प्रहरीको भनाइ छ ।

उर्लाबारी प्रहरीका अनुसार  अनुसार भेटघाट भएको भोलीपल्ट शनिबार फोन गरेर ‘गिफ्ट’ ल्याइदिएको छु भन्दै आचार्यले वालिकालाई कानेपोखरीमा बोलाएका थिए । कानेपाखेरीमा भेट भएपछि साथमा ‘गिफ्ट’ ल्याउन विर्सिएको भन्दै आचार्यले फकाएर आफ्नै घरमा लगेको र रातभर बन्धक बनाएर बलात्कार गरेको प्रहरीको भनाइ छ । घटना भएको रात आचार्यका घरमा परिवारका सदस्य कोही नभएको र केही खानेकुरा मिसाएर पानीमा खान दिएपछि बालिका बेहोस भएपछि  आचार्यले रातभर बलात्कार गरेको प्रहरीले जनाएको छ ।

प्रहरीका अनुसार बलात्कार पीडित बालिका मानसिक रुपमा विक्षिप्त बनेकी छिन् । वालिका चिच्याउने, रुने र कराउने गरेको प्रहरीको भनाइ छ । बलात्कार पीडित बालिकाको कोसी अञ्चल अस्पताल विराटनगरमा स्वास्थ्य परीक्षण र उपचार गरिएको  छ ।  पक्राउ परेका आचार्य विरुद्ध मुलुकी अपराध (संहिता) ऐन २०७४ बमोजिम जवरजस्ती करणी मुद्दाका लागि अदालतबाट म्याद थप गरेर अनुसन्धान सुरु गरिएको प्रहरीले जनाएको छ ।