ओलीले भनेको सांच्चै रहेछ, बिराटनगरमा सयवटा घरका चुला चुलामा पुग्यो बायोग्यास
- ५ भाद्र २०७५, मंगलवार
विराटनगर महानगरपालिका–१४ का स्थानीयको घरघरमा पाइपमार्फत वायो ग्याँस वितरण भएको छ ।
सामुदायिक स्तरको श्रीकृष्ण गौ सेवा सदनले २ सयभन्दा बढी गाईको गोबरबाट वायो ग्याँस उत्पादन गर्ने गरी निर्माण गरेको ३ सय घनमिटर क्षमताको ग्याँस प्लाण्टबाट पाइपलाइनमार्फत यहाँका ३२ घरमा वायो ग्याँस पुर्याइएको हो । उक्त ग्याँस प्लाण्टको प्रधानमन्त्री केपी शर्मा ओलीले मङ्गलवार एक कार्यक्रमका बिच उद्घाटन गरे ।
विश्व बैङ्कको सहयोगमा वैकल्पिक ऊर्जा केन्द र विराटनगर महानगरपालिकाको सहयोगमा करीब १ करोड ५० लाख रुपैयाँको लगानीमा श्रीकृष्ण गौशालामा उक्त गोबर ग्याँस प्लाण्ट स्थापना गरिएको छ । पहिलो चरणमा ३२ ओटा घरमा पाइप जडान गरी ग्याँस वितरणको व्यवस्था मिलाइएको र दोस्रो चरणमा थप ४८ घरमा ग्याँस वितरण गरिने बताइएको छ ।
ग्याँसका सिलिण्डर काँधमा बोकेर हिड्नु नपर्ने ओलीको गफ
सो अवसरमा प्रधानमन्त्री ओलीले विराटनगरबाट ग्याँसका सिलिण्डर काँधमा बोकेर हिड्नुपर्ने अवस्था अन्त्य भएको भन्दै मुलुक विकासको दिशातर्फ उन्मुख भएको बताएका छन् ।
‘३२ घर परिवारले अब काँधमा सिलिण्डर बोकेर कुद्नुपर्ने समस्या हटेको छ,’ प्रधानमन्त्री ओलीले भने । यतिमै मात्र यस्तो प्लाण्ट सिमित नहुने भन्दै प्रधानमन्त्री ओलीले स्याङजा, तनहुँ, कास्कीलगायतका जिल्लाहरुमा समेत ग्याँस प्लाण्टको तयारी भइरहेको जानकारी दिए । प्रधानमन्त्री ओलीले फोहरलाई समस्यामा होइन सम्पतिमा बदलेर विभिन्न फाइदा लिनुपर्ने बताए ।
कार्यक्रममा उर्जा, जलश्रोत तथा सिँचाई मन्त्री वर्षमान पुनले प्रधानमन्त्री ओलीको जनताको घरघरमा पाइपलाइनबाट ग्याँस पुर्याउने सपना साकार भएको बताए । उद्घाटन कार्यक्रममा कानुनमन्त्री भानुभक्त ढकाल, सामान्य प्रशासनमन्त्री लालबाबु पण्डित पनि सहभागी थिए ।
करीब दुई हजार किलो गोबरबाट गत साउन २० गतेबाटै ग्याँस उत्पादन शुरु भएको यो प्लाण्टबाट एक सयभन्दा बढी घरलाई पुग्ने गरी वायो ग्याँस उत्पादन गर्न सकिने बताइएको छ । गौशालाभन्दा उत्तरतर्फ एक किलोमिटरसम्मको बस्तीमा रहेका ४८ घरमा दोस्रो चरणमा ग्याँस पुर्याउने योजना छ ।
