२७ करोड खर्चेर बनाइएको होटललाई खर्च धान्न पनि धौधौ

करिबन २७ करोड खर्चेर थ्रीस्टार होटेलको स्तर, मापदण्ड र आधार  पुर्याइकन धनकुटा हिलेको चुच्चे डांडामा खोलिएको पुर्वी पहाडकै ठुलो र सुबिधासम्पन्न एउटा  होटल पर्यटकको कमीले खर्च बर्च धान्नै धौ धौ अबस्थामा पुगेको छ ।

धनकुटा मुगाका थापाकाजीकै खलक प्रहरीका पुर्व एसएसपी तथा बिराटनगरस्थित रत्ना होटलका साहु रेवत बहादुर थापाले खोलेको होराइजन माउन्टेन होटलको त्यस्तो अबस्था भएको हो । फाट्टफुट्ट बिदेशी पर्यटक  आइपुग्ने यस होटलमा हाल मासिक सरदर दुई तीन सय मानिसहरु मात्रै बास बस्न आइपुग्ने गरेका छन् ।

नेपाली सेनाको हिले बाहिनीसंगै जोडिएको होटल जम्मा ४९ रोपनी जग्गा जमीनको कम्पाउण्डमा अबस्थित छ । त्यस  होटलमा ३७ वटा कोठाहरु छन् , जसमा एकैपटक ७५ जनासम्म आगन्तुक बस्न सक्छन् । हेलिकप्टरमा आउनेहरूको लागि हेलिप्याड पनि छ । आफ्नै तरकारी खेती भएकोले होटलका लागि चाहिने अर्गानिक सागसब्जी त्यहीँबाट परिपुर्ति हुन्छ । त्यस्तै गाइ र भैंसी पालन समेत गरिएकोले दूध पनि बाहिरबाट किनिरहनु पर्दैन । होटलको कम्पाउण्डभित्र नै आकर्षक चिया बगान र आकर्षक बगैंचा पनि छ ।

त्यतिमात्र होइन, पर्यटन बोर्डका पुर्व सदस्य समेत रहेका थापाकाजीको होटलबाट कन्चनजङा, मकालु, सगरमाथा जस्ता धेरै हिमाल र हिमश्रीङ्खला अनि संखुवासभा, भोजपुर, तेह्रथुम, पाँचथर, इलाम, उदयपुर, खोटाङ, सोलु , ओखलढुंगा र तराईका केही भागको समेत दृश्यावलोकन गर्न सकिन्छ । ठण्डा ठण्डा र कुल कुल मौसममा रम्न सकिने होटलमा दुइ दर्जनले रोजगारी पाएका छन् । भविष्यमा बिराटनगरमा रहेको रत्ना होटलमा बस्ने पर्यटकलाइ प्याकेज बनाएर हिलेको होराइजन होटलमा पनि ल्याउने संचालक थापाको योजना छ ।

आफु पर्यटन बोर्डमा हुँदा बिराटनगरलाई अन्तरास्ट्रिय बिमानस्थल बनाइ पुर्वी नेपाललाई पर्यटन केन्द्र बनाउन विभिन्न योजना अघि  सारेको तर सरकारले बेवास्ता गरेको बताउने होटल संचालक रेवत बहादुर थापा धनकुटामा बिमानस्थल बन्न लागेकोमा आशावादी छन् तर अन्तर्राष्ट्रिय बिमानस्थल सहित पुर्वमा ट्रेकिङ मार्ग बनाइ त्यसको  प्रबर्द्धन गर्न सकेमा मात्र पर्यटन र होटल ब्यबशाय राम्रोसँग फस्टाउने थापा बताउँछन् । – अम्बिका भण्डारी