हराएको २६ दिनपछि भेटियो रमिलाको शव, बोरामा बाँधेर सप्तकोसीमा फालिएको पुष्ठी

गत फागुन १७ गते हत्या गरिएकी बेलबारीकी रमिला राईको शव २६ दिनपछि कोसी नदीमा फेला परेको छ ।

सेतो बोरामा हात खुट्टा बाधिएको अवस्थामा राईको शव बुधबार कोशी ब्यारेजबाट फेला परेको हो । राईको हत्या आरोपमा पक्राउ परेका बेलबारीका योगेन्द्र गुरुङको बयानका आधारमा सुनसरी प्रहरीको सहयोगमा मोरङ प्रहरीले राईको शव खोजे पनि फेला परेको थिएन । बुधबार कोशी ब्यारेजका स्थानीय युवाहरुको सहयोगमा राईको शव सप्तकोसी नदीबाट निकालिएको थियो । नदिमा बोरामा शव देखेपछि स्थानीयहरुले प्रहरीलाई खबर गरेका थिए ।

स्थानीय प्रहरीको अनुरोधमा कोशी ब्यारेजका केही  युवाले  करिब डेढ घन्टा लगाएर डुङ्गाको सहयोगमा नदिबाट शव बाहिर निकालेका थिए ।

इलाका प्रहरी कार्यालय बेलबारीबाट खटिएको प्रहरी र रमिलाका आफन्त समेतको टोली सप्तकोसी पुगेका थिए  । आफन्तले पनि शव रमिलाकै भएको भनी स्वीकार गरेको इलाका प्रहरी कार्यालय बेलबारीका प्रहरी निरिक्षक रामकुमार राईले जानकारी दिए ।

नेकपाका नेता समेत रहेका योगेन्द्र गुरुङले हत्या गरेर कोसी नदीमा शव फालेको प्रहरीलाई वयान दिएदेखि नै प्रहरीले शव खोजी कार्य जारी राखेको थियो । पक्राउ परेका गुरुङले हत्या गरेर सप्तकोसीमा शव फालेको बताएका थिए । सो शवलाइ पोष्टमाटमका लागि घोपा क्याम्प लगिएको प्रहरीले जनाएको छ ।