सलकपुरमा राजमार्ग किनारकै पाँचतले घर दिँदा पनि कसैले बनाउन खोजेनन् क्वारेन्टाइन

विश्वभर महामारीको रुपमा फैलिएको कोरोना भाइरसको संक्रमणको सम्भावित जोखिमलाई मध्यनजर गर्दै मोरङ सुन्दरहरैचाका युवराज पौडेलले आफ्नो भर्खरै निर्माण भएको ५ तले घर क्वारेन्टाइनका लागि सरकारलाई दिने निर्णय गरेको एक हप्ता पुग्न लाग्दा पनि कुनै निकायले चासो देखाएका छैनन् ।

मोरङ सुन्दरहरैचा ९ सलकपुरका युवराज पौडेलले चैत ६ गते कोरोनाको क्वारेन्टाइनका लागि पुर्व पश्चिम राजमार्ग किनारमै रहेकोे पाँच तले घर निशुल्क दिने  घोषणा गरेका थिए  । 

१ नं. प्रदेश सरकार र नेेपाली सेना र स्थानीय सरकारहरुको पूर्व तयारीलाई साथ दिन पौडेलले आफ्नो ५ तले घर क्वारेनटाइनका लागि नि:शुल्क उपलव्ध गराउने घोषणा गरेका हुन् ।

आफ्नो १० कोठा रहेको ५ तले घर आवश्यक परेको खण्डमा १ सय जना भन्दा बढीलाई उपचार गर्न सक्ने क्षमताको रहेको पौडेलले बताए । स्थानिय सरकार, प्रदेश सरकार र सम्वधित निकायले आवश्यकता महशुस गरेको खण्डमा क्वारेन्टाइन सेवाका लागि आफ्नो घर उपलव्ध गराउने उनले बताएका छन्  ।

पौडेलले चैत ६ गते फेसबुक मार्फत कोरोना नियन्त्रण नभएसम्मका लागि आफ्नो घर निशुल्क दिने घोषणा गरेका थिए । त्यसपछि मनकारी पौडेल सामाजिक संजाल र सञ्चारमाध्यमहरुमा चर्चामा छन्  तर  चैत ११ गते अर्थात मंगलबार बिहानसम्म कुनै पनि निकायले क्वारेन्टाइनका लागि सम्पर्क नगरेको पौडेलले पुर्वेली डटकमलाई बताए ।

चिनमा पहिलो पटक देखा परेको कोरोना भाइरसको संक्रमण  विश्वव्यापी रुपमा फैलदै नेपालसँग खुल्ला सिमाना जोडिएको भारतमा समेत संक्रमित फेला पर्न थालेपछि प्रदेश नम्वर १ सरकारले उच्च सर्तकता अपनाउदै पुर्वी नाका झापा, मोरङ र उदयपुरमा क्वारेन्टाइन निमार्ण गरेको छ ।

संक्रमण फैलन सक्ने सम्भावनालाई मध्यनगर गर्दै मोरङको टाँडी र सुनसरी र उदयपुरको सिमावर्ती क्षेत्र श्रीलंका टापुमा नेपाली सेना र प्रदेश सरकारको समन्वयमा ६ सय जनालाई राख्न सक्ने गरीको क्वारेन्टाइन स्थापना गरिएको छ ।