बेलबारी साहित्य बिकास समितिको चौथो साधारणसभामा तीनजना स्रष्टालाई सम्मान गरिने

बेलबारी साहित्य बिकास समितिको चौथो साधारणसभाको अबसरमा तीन जना स्रष्टालाई सम्मान गरिने भएको छ ।

यही पौष २४ गते हुने साधारणसभामा बेलबारी क्षेत्रका तीन जना सर्जकलाई पुरस्कार तथा सम्मान पत्रसहित सम्मानित गरिने बेलबारी साहित्य बिकास समिति बुधबार पत्रकार सम्मेलन गरी जानकारी दिएको हो ।

नेपाल प्रज्ञा प्रतिष्ठान उपकुलपति जगमान गुरुङको प्रमुख आतिथ्यतामा हुने साधारणसभामा सम्मानित हुनेहरुमा साहित्यकर्मी इरन राई, कलाकर्मी मेखराज कार्की र प्राज्ञ तथा साहित्यकार गंगा सुवेदी छन् ।

बेलबारी साहित्य बिकास समितिकी अध्यक्ष तिला लेकालीका अनुसार साधारणसभाको अबसरमा बेलबारी साहित्य पुरस्कारबाट २५ हजार नगदसहित साहित्यकार इरन राई, १५ हजार नगदसहित बेलबारी कला पुरस्कारबाट मेखराज कार्की र बेलबारी घर भइ अन्यत्र रहेर साहित्य क्षेत्रमा उल्लेखनीय योगदान गरेबापत प्राज्ञ तथा साहित्यकार गंगा सुवेदीलाई सम्मान पत्रद्वारा बिशेष सम्मान गरिनेछ ।

बेलबारी साहित्य बिकास समितिले यस अघिदेखि नै बेलबारी साहित्य पुरस्कार तथा बेलबारी कला पुरस्कारद्वारा साहित्य तथा कला क्षेत्रमा योगदान गर्ने ब्यक्तिहरुलाइ सम्मानित गर्दै आएको छ । यसअघि पहिलो बेलबारी साहित्य पुरस्कारबाट हर्कमान तामाङ र दोस्रो बेलबारी साहित्य पुरस्कारबाट रमेश लामा सम्मानित भैसकेका छन् । त्यसैगरी बेलबारी कला पुरस्कारबाट श्याम गौतम र शिव छान्छा सम्मानित भइसकेका अघ्यक्ष लेकालीले जानकारी दिइन् ।