शहरी पूर्वाधार विकासका लागि महालक्ष्मी नगरपालिकाले पाउने भो ५० करोड

धनकुटाको महालक्ष्मी नगरपालिकाको शहरी पूर्वाधार विकासका लागि शहरी विकास मन्त्रालयले ५० करोड बजेट उपलब्ध गराउने भएको छ ।

महालक्ष्मी नगरपालिकाको पहलमा मन्त्रालयले सघन शहरी विकास कार्यक्रम अन्तर्गत बजेट उपलब्ध गराउने भएको हो ।
लामो समयको पहलपछि महालक्ष्मीको शहरी पूर्वाधार विकासका लागि शहरी विकास मन्त्रालयबाट ५० करोड बजेट प्राप्त भएको मेयर परशुराम नेपालले बताए । हामीले नगर सभाबाट पारित गरेर बजेट माग गरेका थियौं, बजेट माग्न म पटकपटक मन्त्रालय धाएको थिए । अन्ततः ठूलो बजेट प्राप्त हुने भएको छ,’ खुशी हुँदै मेयर नेपालले भने, यसले महालक्ष्मीको शहरी पूर्वाधार विकासमा निकै ठूलो काम हुन्छ ।’

बजेट उपलब्ध गराएर सहयोग गरेको भन्दै मेयर नेपालले शहरी विकास मन्त्री रामकुमारी झाक्रीलाई धन्यवाद दिए ।

गुल्मी माइतीघर भएकी मन्त्री झाक्री महालक्ष्मीकी बुहारी पनि हुन् । उनी लेगुवाका पशुपति पुरीसँग विवाह बन्धनमा बाधिएकी छिन् ।

शहरी विकास मन्त्रालयले बजेट उपलब्ध गराउने पत्र पठाएपछि धनकुटास्थित सघन शहरी तथा भवन निर्माण आयोजनाले बजेट खर्चका लागि प्रारम्भिक चरणको तयारी थालेको छ । महालक्ष्मी नगरपालिकाका मेयरसहित प्रतिनिधिहरुसँग केही दिनभित्रै छलफल कार्यक्रम राखेर योजना निर्माण गरिने आयोजना प्रमुख रञ्जनकुमार दासले बताए । माथिबाट हामीलाई एक हप्ता अघि नै पत्र आएको छ, अब महालक्ष्मी नगरपालिकासँग छलफल गरेर प्रारम्भिक चरणको काम थाल्छौ,’ आयोजना प्रमुख दासले भने ।

यो बजेट मुख्यगरी सडक निर्माण तथा स्तरोन्नती, भवन निर्माण, हाट बजारको संरचना निर्माण जस्ता काममा खर्च गरिने बताइएको छ । तर, कुनकुन क्षेत्रमा केकति खर्च गर्ने, केकस्तो योजना निर्माण गर्ने भन्ने बिषय छलफलबाट टुंगो लगाइने छ । पहिलो चरणमा नगरपालिका र स्थानीयबासीसँग योजनाका बारेमा जानकारी लिएपछि त्यसको सर्भे गरेर रिपोर्ट पठाइने आयोजना प्रमुख दासले जानकारी दिए ।