जिल्ला समन्वय समिति मोरङमा निर्वाचनको रन्को, सुन्दरहरैचाका राईले सभापति जित्ने पक्का

जिल्ला समन्वय समिति मोरङको निर्वाचन जेठ ३१ गते हुने टुंगो लागेको छ ।

मुख्य निर्वाचन अधिकृतको कार्यालयका सूचना अधिकारी हेमबहादुर बुढाथोकीका अनुसार मतदाता नामावली प्रकासन तथा नामावली सच्याउने वा छुट नाम समावेश र संशोधित मतदाता नामावली प्रकासन बुधबार हुनेछ ।

त्यस्तै मतदाताको विरोधमा उजुरी दिने, उजुरी उपर जाँचबुझ गर्ने र अन्तिम मतदाता नामावली प्रकासन बिहीबार अर्थात जेठ २६ गते हुनेछ । उम्मेदवारको मनोनयन दर्ता, उम्मेदवारको सूची प्रकासन र दाबी बिरोध जेठ २७ गते शुक्रबार हुनेछ ।

उम्मेदवारविरुद्धको उजुरी उपर जाँचबुझ गरेर निर्णय लिने, उम्मेदवारको नामावली प्रकासन गर्ने, उम्मेदवारी फिर्ता र उम्मेदवारको अन्तिम नामावली प्रकासन जेठ २८ गतेलाई तोकिएको छ । जेठ २९ गते उम्मेदवारलाई निर्वाचन चिन्ह प्रदान गरिने र ३१ गते जिल्ला समन्वय समितिको निर्वाचन सम्पन्न गर्ने कार्यतालिका रहेको सूचना अधिकारी बुढाथोकीले बताए ।

स्थानीय तह निर्वाचनबाट विजयी भएका जिल्लाभरका स्थानीय तहका मेयर/उपमेयर तथा अध्यक्ष/उपाध्यक्षले समन्वय समितिको निर्वाचनमा मतदान गर्न पाउने छन् । १७ वटा स्थानीय तह रहेको मोरङमा ३४ जना मतदाता हुने छन् ।

जिल्ला समन्वय समिति मोरङको निर्वाचनबाट एमाले विजयी बन्ने पक्का भएको छ । एमालेबाट समितिको प्रमुखमा सुन्दरहरैँचाका अजम्बर राई र उपप्रमुखमा रङ्गेलीकी उषा झालाई उठाउने निर्णय भइसकेको एमाले मोरङका सचिव रूपेश खतिवडाले जानकारी दिए ।

मोरङमा मेयर/उपमेयर र अध्यक्ष/उपाध्यक्ष गरेर नेकपा (एमाले)का २१, नेपाली काङ्ग्रेसका १२ र नेकपा (माओवादी केन्द्र) का एक जना छन् । स्थानीय निर्वाचनमा माओवादीले मिक्लाजुङको उपाध्यक्ष जितेको छ ।

समन्वय समितिमा स्थानीय तह निर्वाचनबाट निर्वाचित जनप्रतिनिधि मात्रै उम्मेदवार हुन पाउने व्यवस्था छ । नौ सदस्यीय समितिमा प्रमुख र उपप्रमुख, तीन जना महिला सदस्य, दलित वा अल्पसङ्ख्यकमध्ये एक जना र अन्य सदस्य तीन जना निर्वाचित हुने छन् ।