पाँचथरमा बन्यो नेपालकै ठूलो धातुको बुद्द मुर्ति, बजेट निकासा रोकिँदा रंगरोगन प्रभावित

पाँचथरको मिक्लाजुङ गाउँ पालिका ४ मा  नेपालकै सबैभन्दा ठूलो धातुबाट निर्मित बुद्द मुर्तिको निर्माण कार्य अन्तिम चरणमा पुगेको छ ।

  पुर्वी पहाडी जिल्ला पाँचथरको मिक्लाजुङ गाउँपालिका ४ स्थित रबि बजारभन्दा उत्तरपट्टी जडिबुटे सामुदायिक वन क्षेत्रको जडिबुटी डाँडामा ३८ फिट अग्लो  देशकै ठूलो धातुको बुद्धमूर्ति सहितको पार्क निर्माणको काम अन्तिम चरणमा पुगेको हो ।
मिक्लाजुङ गाउँपालिका र स्थानीयवासीको  परिकल्पनामा १७ टन पित्तल धातु मात्र प्रयोग गरिएको   बुद्धको मूर्ति निर्माण भइसकेको छ ।

प्रदेश १ सरकार र मिक्लाजुङ गाउँपालिकाको करिब साढे तीन करोड लागतमा चर्चित मूर्तिकार नवीन सुवेदीको नेतृत्वमा एक वर्षदेखि कठिन चुनौती झेल्दै कलाकारहरूले देशकै ठूलो पित्तल धातुको बुद्धमूर्ति निर्माण गरिरहेका छन् । मुर्तिकार सुवेदीका अनुसार उक्त मूर्ति निर्माण गर्न उनकै नेतृत्वमा मुर्तिकार तथा कामदार गरी १४ जना निरन्तर एक वर्षदेखि खटिँदै आएका छन् ।

बिजुली आपूर्ति नभए पनि पित्तल धातुमा ‘ग्यास वाइल्डिङ’ गरेर बनाइएको बुद्ध ध्यानमा बसेको देशकै अग्लो धातुको मूर्ति निर्माणकार्य सकिएको र रंगरोगनको केही काम मात्र बाँकी रहेपनि बजेट निकासा नहुँदा काम प्रभावित भएको निर्माणका ठेकेदार तथा मुर्तिकार नवीन सुवेदीले जानकारी दिए ।

मिक्लाजुङस्थित जडिबुटे वन क्षेत्रको करिब पाँच कट्ठा जमिनमा नवीन स्कप्चर्स प्रा. लि. मार्फत निर्माण भएको देशकै अग्लो र ठूलो पित्तल धातुको बुद्धमूर्तिसहितको पार्क पालिकाको मात्र नभएर देशकै गहना हुने मुर्तिकार सुवेदीले बताए ।

शुरुमा ३५ फुट अग्लो बनाउने सम्झौता भएपनि गाउँ पालिकासँगको मौखिक समझदारी मा ३८ फुट अग्लो मुर्ति बनाइएको नवीन स्ट्रक्चर्स प्रा.लि. का संचालक मुर्तिकार नवीन सुवेदी बताउँछन् ।

२०७६ सालमा एक बर्षभित्र निर्माण सक्ने सम्झौता भएपनि लकडाउन, मुल्यबृद्दि र दक्ष कामदार अभाव र प्रक्रिया गत ढिलाइ एवम्  बजेट निकासामा ढिलाइ लगायतका कारण  २/३ पटक म्याद थप्नुपरेको थियो । खासगरी रंगरोगनको काम मात्र बाँकी रहेको र एक महिनामा मुर्ति निर्माणको काम सकिने अबस्था भएपनि गाउँपालिकाले बजेट रोकिदिँदा मुर्ति निर्माणको काम अलपत्र हुने अबस्था सृजना भएको मुर्तिकार सुवेदी बताउँछन् । फेसबुकमा स्टाटस शेयर गर्दै उनले गाउँपालिकाको रवैयाप्रती असन्तुष्टि जनाएका छन् ।

सानै उमेरदेखि मुर्तिकलामा रुचि भएका नवीनले स्कुल पढ्ने क्रममा २०५१ सालदेखि ढुंगा कुँदेर मुर्ति बनाउन थालेका थिए । ललितकला क्याम्पसबाट मूर्तिकलामै डिग्री सकेका मोरङ लेटाङ निबासी नवीनले हालसम्म ढुंगा, फाइबर र धातुका गरी हजार भन्दा बढी मुर्ति बनाइसकेका छन् । उनले केही बर्षअघि काठमाडौंमा आफुले बनाएका मानव आकृतिका मुर्तिहरुको प्रदर्शनी समेत गरेका थिए ।
नवीनले बनाएका मुर्तिहरु गोर्खा, सिन्धुली, काठमाडौ लगायत नेपालका विभिन्न सार्वजनिक स्थल तथा मठ मन्दिरहरुमा राखिएका छन् । आफ्नै लगानी तथा मिहिनेतले हजारौं मुर्ति बनाइसके पनि उनी राज्यको नजरमा भने पर्न सकेका छैनन् । – अम्बिका भण्डारी